Etiqueta: Formientu 12

Dexa de dexate la vida. Dexa de falar babayaes y talanta.
Talanta güei, talanta mañana, talanta mañana pela mañana.
Talanta pela tarde y pela nueche.

Talanta porque ellos talanten. Talanten darréu, talanten ensin posar en dengún momentu.
Talanten que-yos va la vida nello.
Talanten que si nun lo faen, y nós sí, dexaríen de seguir u tan, faciendo lo que faen, frayando lo que frayen.

Talanta y nun dexes de facelo. Enxúgate la to tiesta y el to celebru.
Dexa de dexate la vida.
Collaciu, callacia caleya y talanta. Alienda y glaya. Talanta y fai.
Dexa de dexate la vida.

Los ruíos que francen los mios oyíos güei suenen guapo.
Suenen a vegaes a canciu, güel a llerza insana.
Llaceria que tien por envís unvianos roxura.

Los ruíos que frayen los mios oyíos güei suenen raro.
Suenen a vegaes distorsionaos pol ruíu, yá lo dixi.

Agora, los ruíos que frañen los mios oyíos güei acolumbren son.
Son de puxarra mal ferío y desfecho.
Suenen a vegaes verdes, pardos, bermeyos…

Y sí, los ruíos musicales que la mio tiesta pescuda
Nun los quixere naide.

Ye sero y la camba ta n’otru cuartu, el d’al llau.
Les sábanes llimpies, daqué cutes, asperen con gana.
Ásperoles más yo qu’elles a min.

Ye sero, pero sigo escribiendo notes de lletres sordes.
Tan sordes.
Fustax que sema enfotu sofitáu pola zuna que tienen
los cabellos mariellos de la señardá.

Ye sero, los suaños nagüen por amosame una hestoria
enllena aición buxa.

Sero, sero, sero. Sele como l’aire que nun sabe dica ú va.
Ceo enxamás lo sedrá, siempres, paez, que sedrá sero,
Y yo, nun podré colar pa la cama.

11:21

Nesi momentu
nel que mos facemos otres,
cuando dexes el ñeru
con ansies de caparina
y na holanda muer la piel
d’una mazana,
entós, criatura de silenciu,
yá ta eclosionando
sobre l’alfombra
un bostezu de brazos músicos,
piyama gris
y espalda de canela.

14:33

Entro na cocina
con fame de tierra,
pero cuchiellos
vitrocerámiques
azulexos.
Esperanza pequeña
tovía:
unes uves verriondes,
lleche que ye niebla
y los tos pies descalzos.

19:04

Hola, neña
rizos pegañosos pela cara
como les bruxes nes fogueres
sorrisa amplísima
superglú nos caniles
los güeyos como dos duralex
(redondos,
inyectaos en mantega
y siempre con un frixuelín
cara al públicu)
¿Traes fame?
la bata yera de seda’l Xapón
pintárala Kandinski
nel economatu
les madreñes con plumes a torcer
y nun volaben más p’allá
de la figal
Entra, ne, que ta xelando
arroyába-y la sangre pela navaya p’abaxo
(l’esmalte encarnao de la farándula)
los calcetos taben siendo procesaos en L’Haya
por crímenes contra la humanidá
les uñes recién perfumaes
nun llavaderu carbón
la madre de Hildegart
ficiera dalgo mui gordo
Díxome to ma que te diera la cena
espetóme mio güela col alma arremellá
de tener raxao-y el pescuezu
a una pita.

00:48

L’avant-garde vio costra poética
sobre les tos costielles.
Pero yo soi probe.
El to pechu ye una cama nel horru
pa cuando llueven
nardos azules y cobertores
pela tierra semada de les clavícules.

04:19

Tarrécelo too
salvo’l sudor sele d’una frente.
A qué se cayó l’home.

Naguar por sentir
les manes enllenes de feríes,
los pies con cristales n’ellos.
Quedar ensin aliendu.

Naguar por cayer valtáu
depués de correr descalzu
ente les ortigues,
ente les piedres.

Naguar por llorar
bañame en llárimes,
glayar hasta quedar afogáu.

Naguar por lluchar,
da-y un golpe,
face-y sangrar.

Naguar por espurrime,
por tar de pies
col airón besándome na piel.

Naguar por ganar
depués de sentir,
depués de cayer,
depués de llorar,
depués de lluchar.

Davezu camiento qué sedría de ti con otru amu.

Ún que ficiere que les tos piernes fueran fuertes pa caleyar per milenta siendes.
Ún que ficiere que los tos llabios fueren la puerta p’algamar el cielu.
Ún que ficiere que nel to vientre xorreciera maxa ya saliera vida.
Ún que ficiere que los tos brazos nun escaezan dar nengún abrazu.
Ún que ficere que de la to boca namás escapen afalagos.
Ún que ficiere que de los tos güeyos nun salgan mas llárimes.
Ún que ficiere que na to tiesta nun hubiere estos camientos prietos.

Davezu camiento que sedría de ti ensin min.
De min ensin min.

Contáronmelo pa que lo contara,
contara la mio verdá,
verdá d’una tierra amada,
amada por siempre xamás.
Xamás podré olvidate,
olvidate enxamás,
enxamás podré falar otra llingua,
llingua d’otra tierra o mar.
Mar d’orbayu negro,
negro de tanto llorar,
llorar por esta tierra,
tierra por tantos soñá.
Soñá polos que tán lloñe,
lloñe nunca se ta,
ta metida nel pechu,
pechu d’asturianos de verdá,
verdá como la que sienten,
sienten que nun la puen olvidar.
Olvidar ye mui difícil,
difícil tamién ye amar,
amar como cuando s’ama,
cuando s’ama como a una ma.

Cuenten que Manolín, esi del Soutu,
cuando taba esiliáu
per tierres arxentines intentando
facer perres o tiempu o lo que fora
díxo-y a un compadrito bonaerense:
“Na mio tierra, el más ricu
ye’l que más mierda tien”.

Y aquel otru,
envede echase a rir o convidalu
a un mate bien amargo
quedó pensatible y contestó-y:
“Na mio tierra ye igual, y creo que dayuri.
La cosa ye qu’equí
la porquería escóndenlo
embaxo les alfombres”.

La irreducible fuercia del azar,
qu’esguila pelos nomes y les llistes,
quiebra una ponte, merca una guitarra,
fai caldu colos güesos de los muertos,
dexa la lluz encesa, mata un perru,
camuda los destinos de los homes,
borra ciertes pallabres que s’oculten
nes coraes del caberu de los llibros,
ruempe, remembra, tacha, emburria, quema

y too pa qu’unos güeyos güei se crucien
y caiga del revés una moneda
qu’escaecimos va tiempu que tiramos.