Etiqueta: Formientu 13

Por ti, muyer de los pueblos
que te llevantes al alba
col primer cantar del gallu
y garres madraña y saya
pa entamar con toles xeres:
Trepes y trepes per casa
fregues, llimpies, barres, llaves…
y el cocíu nunca falta.
La rayada’l sol da fuerte,
resuelles cola gadaña,
desbrozando señardaes,
de trabayar yá tas farta…
y nun pares un migayu,
duelte’l cuerpu, duelte l’alma
¡quién de ti s’escaeciera!
¡quién nun t’echare en falta!
Ai del día que nun teas,
yá naide como tu habrá,
que fuisti la pegollera
d’esta tierra que trabaya
por llabrase a fesoriazos
un futuru que mos valga…

Andando pelos senderos de la plena vida
sigo’l cercu de los mios pasos.
Cuántes emociones vivíes y por vivir.
Ente roses y escayos atoparé’l mio camín
enllenu de fantasía y ensin malpenes olvidu.
Yo asina siguiré como lo faen pocos,
buscando na vida los mios suaños llocos.
Travesaré montes, cumes y cantiles,
pero enxamás dexaré los mios suaños atrapaos.
Un suañu onde los escayos
conviértense en formoses roses.
La vida conduzte escontra’l to destín,
Maldita seya la suerte que quiera atayar el to camín
Y yo sigo y sigo suañando con esi camín, que me guíe escontra’l mio destín.

Calculo cada pasu

pensando nel futuru

                                  turu

                                      turu

                                           turu

                                                 turu

                                                     turu

                                                        turu

                                                            turu-rú

Xuegues a calentame;

atrapáu nes tos vueltes

espiertes la mio mirada.

Contigo la nueche é corta,

la mañana ensin ti llarga.

Quémesme los llabios.

Sabes a café.

Les muries falen lo que les boques callen,
lo que les mentes quieren dicir
nos caberos tiempos de silenciu.

Van acabando los tiempos ruinos
de gachar cabeza, d’amosar el cuerpu feble,
de sortiar les puñalaes de los malnacíos.

Retorcíes mentes que quieren el dolíu
pa la nuesa xente; que fuxe, que cola,
que nun ve futuru nos sos pies, nes sos manes…

Tienen d’arrendales pa xorrecer.

Nun sabes xugar al axedrez,
pero sabes cómo mover fiches pela vida;
no importante
a más d’ún dibes gana-y la partida.
Yes mio reina,
llibre de movimientos,
y anque me llames rei,
dende va meses toi en xaque:
ximielgues el culu camín de la cocina
y cliso los güeyos munches,
munches veces pa ver si ye verdá
o toi metíu nun suañu.
Les baldoses son el tableru,
tamos solos, frente a frente,
y tu aproveches la to condición
de reina pa comeme
en toles direiciones.

Xaque
y mate.

Aprovecen les nueches

d’insomniu,

de llárimes vertíes

al llume llentu la lluna,

d’iviernos

que xelaron corazones

furaos por xarabatos

de besos escaecíos,

de prietes velees

qu’anubren el maxín

y amburen los güeyos,

esperando, como don Antonio,

otru milagru de la primavera.

Sí, aprovecen.

A la fin del día
tres la lluna
escuéndense secretos
que naide sabe.
Misterios que naide cunta
nin naide quier saber.
Escuéndense suaños,
esperances, alcordances…
Y peles nueches
hai xente que prefier
pensar nesi llugar
que lluchar p’algamalu.